Iriga City – Boot na ilangkaw sa mas magabat na Enhanced Community Quarantine an gabos na lugar sa rehiyon kan Bicol, ini kasunod kan padagos na spike O paglangkaw nin kaso kan corona virus disease covid-19 sa rehiyon.
Ini an pirmadong rekomendasyon kan Albay Medical Society, Camarines Sur Medical Society, Philippine Medical Association- Bicol asin Philippine College of Physicians-Bicol region sa surat na ipinadara kan DILG Sec. Eduardo Año, kasunod kan magkapirang findings na saindang nahihiling kabali na an kapabayaan kan mga local na opisyal asin kakulangan nin kooperasyon kan publiko sa mga ipinapasunod na health protocol kan IATF.
Tinaw’an nin duon kan nasabing mga doctor na maluya an testing asin contact tracing na pinag-gigibo kan mga nanunungdan sa local level lain pa sa soksokan na quarantine asin isolation facilities asin kinakapos na mga ICU beds sa man lain-lain na ospital pribado man O sa gobierno.
Sa presente, manonotaran an spike O halangkaw na kaso kan covid sa tulong mga probinsya sa rehiyon na kinababalihan kan Camarines Sur na 40% kan kabilugan na kaso naghahali, Albay 30% asin Sorsogon na digde naghahali an 15% nin kaso naghahali ara-aldaw, mientras na an 15% ini hali sa ibang mga probinsya sa rehiyon. (Melvin F. Barayoga, RPN DZKI Iriga OIC, photos courtesy of Bicol News Facebook page)