Nagkadaiyang matang sa panginabuhian ang gihan-ay sa syudad ubos sa administrasyon ni Mayor Oscar Moreno pinaagi sa City Veterinary Office alang sa mga backyard hog raisers nga naapektuhan sa African Swine Fever (ASF).
Pipila niini nga mga plano mao ang rabbit raising, ready to lay eggs production, broiler chicken and free range chicken raising, quail eggs production, goat/sheep production ug ducks production.
Gibutyag ni Officer-in-Charge City Veterinarian Dr. Lucien Anthony Acac nga nakigtigom na sila sa mga kadagkuan sa Department of Labor & Employment (DOLE) pinangulohan ni Regional Director Albert Gutib alang niini nga proyekto aron maabagan sa maong ahensya pinaagi sa ilang existing usab nga mga livelihood program.
Mapasalamaton si Dr. Acac sa positibo nga response sa DOLE ug naglaum nga matuman kini aron adunay alternatibong panginabuhi ang mga farmers samtang dili pa mahimo makabalik pagbuhi og baboy sa kasamtangan.
Gawas sa DOLE, nangita usab og laing ahensya sa gobyerno ang City Vet ilabina sa national nga posibleng makahatag og dugang pundo alang sa maong mga proyekto. (City Veterinary Office)