Cebu City – Nagplano ang mga driver sa traditional jeepney sa Sugbo nga modangop na lang sa kadalanan aron magpakitabang sa publiko aron lang mabuhi.
Kini ang gibutyag ni Greg Perez, Pangulo sa Pinagka-isang Samahan ng mga Tsuper-Operator Nationwide, PISTON-Cebu Chapter.
Matud ni Perez kon wala na gyoy mahimo ang mga driver sa traditional jeepney gumikan sa migrabe pa nga problema sa kawad-on epekto sa COVID-19 pandemic, hayan ilang sundon ang gibuhat sa mga jeepney drivers sa kauluhan nga nagpakilimos na lang sa publiko aron ilang mapaka-on ang ilang pamilya.
Gi-angkon usab ni Perez nga mga ONE PERCENT (1%) lang sa ilang mga myembro ang nakapahimulos sa mga ayuda gikan sa kagamhanan sama sa Social Amelioration Program (SAP) subsidy ug ubang ayuda gikan sa lain-laing ahensya gobierno.
Matud usab ni Perez nga bisan ang Land Transportation Franchising and Regulatory Board-LTFRB-7 mipasalig usab og hinabang financial ngadto sa mga jeepney drivers, apan way nadawat nga hinabang ang mga driver.
Gi-awhag usab ni Perez ang Department of Social Welfare and Development (DSWD) nga gahinan bisan podyot sa financial assistance ang mga jeepney drivers nga adto kuha-on gikan sa dyes bilyones pesos kapin nga savings niini sa SAP subsidy.
Dinhi sa Sugbo, mokabat sa kinyentos (500), ang mga myembro sa PISTON, dugang ni Perez.
(Mike Mahusay/Jhon Tadlip)
(Source & Photo: PISTON – Cebu Chapter)
