PAGSUYOD NAN MGA “APOR” GIKAN SA MGA SILINGAN NA PROBINSIA MAS STRIKTUHON
Nunot nan inin sitwasyon kuman na jaoy paghamok sa mga natakdan nan CoViD-19 tibuok Rehiyon Caraga, tagsugyot kuman nan ciudad ngadto sa probinsia na mas striktuhon pa an pagbantay sa mga pagutlan o borders para mas maseguro na wayay kontaminado na individual o tawo sanan mga butang an makasuyod sa probinsia sanan ciudad.
Tagsugyot nan kagamhanan nan ciudad sa pagpanguna ni Mayor Ernesto Estong Matugas ngadto sa Regional Inter Agency Task Force pinaagi na sa kagamhanang probinsial nan Surigao del Norte, bisan sa mga tag konsidera na mga APOR kun Authorized Persons Outside Residence.
Taglaong ni Mayor Matugas na ila tagsugyot na kinahanglan magpa rapid test anay an tanan mosuyod na mga tawo didto pa sa ila mga lugar na taggikanan ug ipakita an resulta sa mga checkpoints, kinahangaln na an resulta dili pa molabay nan pito ka adlaw. Ini an agi pagdugang seguridad kontra CoViD-19 nan tibuok probinsia sa Surigao del Norte lakip an ciudad Surigao. (Jhino Parrucho, Ronda 10 RPN DXKS)
