Cebu City- Ang mga front-liners ug close contacts sa una nang hitaptan sa coronavirus disease o COVID-19 ang naglabi sa nadugang nga mga kaso sa probinsiya sa Sugbo.
Sumala pa sa report sa Department of Health o DOH-7 sa milabayng adlaw, 68 ang uwahing natala nga bag-ong kaso hinungdang nahimo nang 949 ang tanan.
Apan sa maong gidaghanon, 697 lang ang aktibo diin 373 ang naadmit sa tambalanan samtang ang nahibilin gipaubos sa home o facility isolation.
Ang Talisay City, nga nagsilbing utlanan sa Cebu City ug Cebu province, mitala og 11 ka bag-ong positibo sa virus hinungdang miabot na ang tanan og 232.
Ang mga bag-ong kaso sa Talisay gilangkoban sa usa ka trabahante sa pribadong ospital, usa ka nurse sa CSMC o Cebu South Medical Center, ug usa ka polis sa Mandaue City; duha ka pasyente sa maternity sa CSMC, lima ka pasyente sa ILI o influenza-like illness ug SARI o severe acute respiratory infection.
Nasayran nga sa 232 ka kaso sa Talisay, 105 lang ang aktibo, 90 ang naulian ug 37 ang namatay.
Samtang ang lungsod sa Minglanilla nakatala usab og napu ka bag-ong kaso sa Covid 19 diin lima ang close contacts sa una nang natakdan ug ang laing lima frontline workers ug kawani sa gobyerno hinungdang nahimo nang 144 ang tanan.
Segun sa DOH 7, tulo ang uwahing natala sa Liloan, usa sa Danao City, unom sa Bogo City, 11 sa Consolacion, duha sa Carmen, ug tagsa sa Dalaguete ug Boljoon.