Pagadian City – Kusganong gipadayag sa mga miembro sa Sangguniang Panlalawigan sa Zamboanga del Sur nga mohimo kini og legal nga aksyon batok sa giingong pagpanamastamas sa ilang mga dagway sa gilusad nga rally sa Team Arangkada Pusong Asenso ning milabayng adlawng Mierkules.
Sa press conference kagahapong adlawa, gibutyag ni Board Member Atty. Dang Mariano nga parehong civil ug criminal actions ang ilang himuon batok sa mga organizers sa nasangpit nga rally.
Bwelta ni Mariano nga ang natigayong rally ug pagsunog sa mga effigy kun imahe ni Gov. Victor Yu ug Cong. Divina Grace Yu lakip na sa mga board members maoy tinuod nga “complete political harassment” ug dili ang ilang gipagawas nga mga desisyon sa Sangguniang Panlalawigan.
Pagpaklaro ni BM Mariano nga usa ka “official act” kun kabahin sa ilang trabaho ang nahitabong hukom labot sa pipila ka mayor sa probinsya nga nasuspenso.
Dugang pa niya nga kung aduna may sayop sa ilang gibuhat, adunay hustong korte o mismong Office of the President diin makaapela ang mga complainant ug dili ang pagpasiugda og rally nga mismong mga public officials usab ang nag-organisa.
Gisaysay ni BM Mariano nga nagpa threat assessment na ang mga board members labot sa posibleng epekto sa maong aktibidad nga giingong “mockery” kun pagbugal-bugal sa ilang dignidad ingon nga mga public servants ug motisok unya og kasuko sa mga tawo batok kanila.
Gibutyag usab ni Mariano nga bisan gitugotan ang peaceful assembly, adunay violation sa gihimong rally sa Pagadian City sama na lamang sa pagsupak niini sa Batas Pambansa No. 880 Section 13 diin ginadili ang malisyosong pagsunog og bisan unsang butang sa kalsada panahon sa maong klase sa panagkatigom.
(Source: ZDS Press Bureau, photos courtesy of Pagadian news icon)
