Dao, Pagadian City – May kalabutan sa gibalita nga pagka-aksidente sa usa ka truck nga adunay karga nga mga smuggled cigarettes sulod sa Provincial Government Center, buot namong ipahibalo nga ang sub-office sa Bureau of Customs anaa sulod sa PGC.
Dunay pagtugot sa Provincial Government ang paggamit sa maong luna sulod sa PGC aron mapahiluna ang mga nakumpiska nga kontrabando sa gipahigayong anti-smuggling campaign sa probinsya.
Ang maong mga sigarilyo temporaryong gibutang sa sub-office sa Customs tungod kay walay lapad ug maayong butanganan niini sa ilang estasyon.
Gikan sa PGC, ipakanaug unta kini pabalik sa ilang estasyon alang sa pagahimuong presentation of accomplishment apan naaksidente hinuon kini kaganehang sayo sa udto.
Atol sa maong insidente, atoa sa lugar ang presensya sa PNP ug Customs Police.
Gipasalig sa administrasyon ni Gov. Victor Yu nga hingusgan niini ang kampanya batok sa iligal nga binuhatan ilabina ang smuggling sa probinsya.
Ang pagkakumpiska sa mga illegal nga sigarilyo sa mga lungsod ning bag-uhay pa lamang usa ka dakong resulta sa pag-activate sa Provincial Task Force on Anti-Smuggling nga maoy hiniusang paningkamot sa PNP, CUSTOMS, BIR, DTI, COAST GUARD ug uban pang ahensya sa gobyerno.
(Source: ZDS Press Bureau, photos courtesy of Victory Zamboanga del Sur)
