Zamboanga del Sur – Malampusong gipahigayon ang pagsugat sa Chinese New Year ug deklarasyon sa mga mananaug sa Christmas Around the World kagabie sa Pavilion Hall, Provincial Government Complex, Dao, Pagadian City.
Ang simpleng seremonya nakigduyog sa kasaulogan sa Filipino-Chinese Community sa probinsya diin gitambongan kini ni Gov. Victor Yu, Aspirant Mayor Atty. Jackie Bana, Aspirant Vice Mayor Romeo “Tata” Pulmones ug Congressional Aspirant Victoria Yu kauban ang mga board members.
Kagabie, Enero 31, gideklara na usab ang mga mananaug sa mga maanindot nga Christmas display sa Dao Provincial Government Center nga namugna pinaagi sa partnership sa mga government agencies ug private establishments.
Naangkon sa Australia Opera House ang 4th runner up sa ganti nga P30k, 3rd runner up ang Cherry Blossoms sa Japan nga gigantihan og P40,000 samtang 2nd runner up ang London Tower Bridge nga adunay premyong P60,000.
Nakuha sa Eiffel Tower sa Paris ang first runner up nga P80,000 ug ang champion sa tanang Christmas display mao ang Petronas Twin Towers sa Malaysia nga mibitbit sa P100,000. Samtang ang uban nga Christmas attractions midawat og tag-P20,000 isip consolation prize.
Ang tanang cash prize gikan mismo ni Governor Victor Yu isip iyang pahalipay sa creativity ug resourcefulness sa tanang mga participating groups nga nakahatag og kalipay panahon sa Pasko sa mga Zambosurians.
Gitapos ang selebrasyon sa usa ka bonggang fireworks display isip pagsugat sa Year of the Water Tiger.
(Source: ZDS press bureau, photo courtesy of Victory Zamboanga del Sur)
