Mapasalamatong gidawat sa 15 ka mga kanhi miyembro sa walhong grupo ang tabang nga gisaad sa Panggamhanan ngadto kanila human sila mikanaog ug mibalik sa sabakan sa gobyerno.
Personal kini nila nga nadawat niadtong niadtong miaging adlaw sulod sa 58 Infantry Battalion, sa Barangay Mingbanday, munisipyo sa Claveria. Pinaagi sa Enhance Comprehensive Local Integration Program (E-CLIP) nabubo kanila ang kinatibuk-ang kantidad nga mokabat sa P2.5 million diin sa livelihood assistance adunay natunol nga Php 50,000.00; Reintegration Assistance nga 21,000.00; Immediate Assistance nga Php 15,000.00; ug ang Firearms Remuneration nga Php 2,379,000.00. Ubos sa Republic Act No. 7160-Local Government Code of 1991, gimandoan ang matag-LGU sa paghatag og mga serbisyo alang sa kaayuhan sa katawhan lakip na ang mga programa ug proyekto alang sa mga kanhi rebelde nga moila sa ilang katungod isip mga inilang miyembro sa katilingban.
Dako ang pagpasalamat ni Alyas Dino kinsa adunay kinatibuk-ang nadawat nga Php 916,000.00 ngadto ni Presidente Rodrigo Duterte ingon man sa DILG ug panggamhanan sa Misamis Oriental pinangunahan ni Gobernador Bambi Emano alang sa kahigayonan nga gitanyag ngadto kanila nga makabaton ug kalinaw nga pamuyo uban ang ilang pamilya.
Personal kini nga gitunol ni DILG-Misamis Oriental Provincial Director Engr. Maricia Naybe uban ni Board Member Dexter Yasay isip representante ni Gobernador Bambi Emano, Claveria Municipal Mayor Meraluna S. Abrogar ug mismong si Lt. Col Ricky Canatoy.
Hugot ang suporta sa amahan sa lalawigan sa kampanya sa nasyonal nga panggamhanan batok insurhensiya hilabina nga tumong niini nga maila ang probinsya sa Misamis Oriental pinaagi sa iyang programa sa turismo diin ang kahusay ug kalinaw adunay dakong papel sa katumanan sa iyang damgo.
(Source: DILG-MisOr | Misamis Oriental Provincial Information Office Facebook page)