Zamboanga del Sur – Mokabat sa napulo ka coastal barangays sa tibuok Zamboanga del Sur ang nakadawat og libreng similya sa agar-agar sa tibuok bulan sa Enero sumala sa Social Services Facilitators Office sa kagamhanang probinsyal.
Sumala ni Assistant Supervising Facilitator Amad Frias, lakip sa mga benepisyaryong barangay mao ang Brgy. White Beach ug Bomba sa Pagadian, Bulanit sa Labangan, Ambolon sa Vincenzo Sagun, Abong-Abong sa Tabina, Balong-balong sa Pitogo, Bubowal sa San Pablo, Pangpang sa Lapuyan ug Pantad sa lungsod sa Dumalinao.
Dako ang pagpasalamat sa mga seaweed farmers sa nasangpit nga mga barangay tungod kay naabtan sila og usa ka programa nga haom sa ilang panginabuhian.
Ang pag-apod-apod sa mga seaweeds ilawom sa sustainable livelihood program ni Governor Victor Yu nga gituyo pagmugna aron mahatagan og dugang income ang mga seaweed farmers sa coastal barangays sa probinsya ilabina karong panahon sa pandemya.
Gawas sa libreng similya, gihatagan usab og libreng technical assistance ang mga benepisyaryo aron mas mapalambo ang ilang produksyon ug makapaambit usab sa ilang mga abot ngadto sa uban pang coastal barangays.
(News & photo courtesy of ZDS Press Bureau)
