Atul sa Privilege Hour nan ika-43 na Regular Session nan Sangguniang Panlalawigan kagahapon, Mayo 4, 2020 nagpabati nan mensahe si Board Member Juan Fernando Larong kun diin ija tagpadayag na tinguha nija subay sa nabati gikan sa mga ordinaryo na mga Surigaonon, na magpapasar nan Resolusyon na mag hangyo na itugot pagbalik an pag angkas sa motorsiklo partikular sa mag-asawa sanan sa mag isig kapamilya.
Sulti ni BM Larong na kun social o physical distancing an rason sa pagdili sa pag angkasan, sa ija tan-aw an mag-asawa o bisan magkapamilya tibo sa isa ka bayay, tibo sa isa ka kuarto maglisod pag tenir na dili gajod magkasabod so matud pa na uno man lisod lisuron man na di mag-angkasan kun jaoy panaw na sa bayay magpikit man.
Taglitok isab ni BM Larong an mga bentahe nan kun katugutan pag backride sa motor an mag isig kapamilya.
Hinuon nakasugat nan tignaw na pagdawat sa ija mga kaiban sa hunta probinsial an plano ni Larong, tungod sa malaong na teknikalidad pareho na kinahanglan mabutangan nan proteksion an mamahimong reglamento para dili maabuso; ikaduha na basin mamahimong kontraryo ini sa mga nahiunang reglamento na tagpahimutang nan pipila ka mga ahensia nan kagamhanan. Pero nagsulti isab an pipila ka bokal na dili sila kun kontra sa sugyot ni Bokal Jeff Larong.
Sa ija reaksion sa tagpasingdan nan ija sugyot, namahayag si Larong na ija ipadangat sa DILG para sa ila opinyon an interes nan kahamukan sa katawhang Surigaonon. (Jhino Parrucho, Ronda 10 RPN DXKS)