Davao de Oro – Laoman sa mga katawhan ang mas kusog nga pag ubos sa bayronon sa singil sa kuryente kon ugaling mag-operate na ang “₱ 1.1 Billion Pantukan-Samal Submarine Cable Project” sa NORDECO (ang bag-ong DANECO), nga solution matud ni NORDECO GM Mario Angelo Sotto sa problema sa Power Supply sa Samal Area nga hangtud karon ginatapadahan sa Electric Cooperative.
Hinoon hinay-hinay na matud pa niya nga naga ubos ang bayronon matag kilowatt hour sa kuryente tungod sa kusog nga pag-ubos sa systems loss human nasulbad panahon sa iyang pagdumala ang kapin kon kulang 8 ka tuig nga problema sa Electric Coop tungod sa dakong tabang nila ni Gov. Tyron Uy ug Papagov Senior BM Arturo “Chiongkee” Uy.
Gisulti kini ni NORDECO GM Sotto panahon sa live interview kaniya via skype ni Michael Uy sa PIA atol sa “State of the Province” ni Gov. Tyron Uy nga gi broadcast sa Z-Radio 88.5 FM niadtong Agusto 24, 2020 sa alas 9:00-10:00 sa buntag.
Sa pagkakaron naa na lang sa 14% ang Systems Loss sa NORDECO gikan 23% sa diha nga siya nagsugod pagdumala niini nga nag-unang rason matud ni GM Sotto sa hinay-hinayang pag-ubos sa bayronon sa kuryente tungod 3% na lang ang excess sa 11% tolerable level sa systems loss.
Paningkamot sa management sa NORDECO matud pa niya nga mag single digit na lang ang systems loss nga posibleng mahitabo sa dili madugay tungod sa line clearing ug vegetation clearing sa tibuok franchise area nga gihimo sa mga empleyado ug mga trabahante sa electric coop.
Apan ang mas kusog nga pag-ubos sa singil sa kuryente matud pa niya mahitabo kon mag single digit na lang ang systems loss ug mamamahimo nang operational ang “₱ 1.1 Billion Pantukan-Samal Submarine Cable Project” nga makahatag ug baratong Power Supply sa Samal Area. (Gilbert M Cabahug PAO-ID DDO, photo by NORDECO INC.)
