Davao de Oro – Priority sa development ang 110 kanhi mga conflict affected barangays sa Province of Davao nga gideklarang insurgency free sa AFP, ug unahon matud ni Gov. Jayvee Tyron Uy ang napulo nga mga napiling super priority diin unang hunat ang pag-atiman og pagpalig-on sa mga Peoples’ Organization aron sila mamahimong agent of change and development diha sa community.
Si Gov. Tyron mihatag sa iyang inspiring message ngadto sa mga miyembro ug opisyal sa gimugna niyang “Provincial Task Force for the Strengthening of Peoples Organization under ELCAC” sa Davao de Oro nga nagtapok diha sa kapitolyo niadtong Huwebes (Agusto 13, 2020) alang sa usa ka adlawng Action Planning Workshop aron maplastar ug mahan-ay ang mga angayang himoon nga maatiman ug mapalambo ang katakos sa mga Peoples Organization sa DDO.
Kining grupoha gimugna sa gobernador ilalom sa Executive Order (EO) no. 0048-2020 nga iyang gipagula niadtong Hulyo 1, 2020, ug segon sa gipagulang EO dumalahon kini sa Executive Committee nga iyang gipanguluhan kauban si Vice Gov. Maricar Zamora-Vice Chair ug mga miyembro sila Provincial Administrator Virgilia S Allones, DILG PD Noel Duarte, ug mga dagkong opisyal sa kapulisan ug kasundalohan.
Katabang sa Executive Committee ang gimugnang pito ka mga Task Groups diin Chair Persons sila PAGRO Chief Dr. Minda Agarano sa “Main Coordination and Secretariat Group”; Cooperative Development Division Chief Manuel Buladaco sa “Organizational Development and Strengthening Group”; Engr. Arnold Del Pilar sa “Agriculture, Livestock and Fishery Production Technology Support Group”; DTI DDO PD Atty. Lucky Siegfred Balleque sa “Enterprise Development Promotion and Marketing Assistance Group”; PTO Chief Nora Cagas sa “Financial Management and Credit Linking Group”; PASSO Chief Engr. Abenir Labja sa “Tenural Instrument Group”; ug PPDO Chief Romeo Celeste sa “Monitoring and Evaluation Group”.
Human sa gihimo nilang Area Clearing and Evaluation, ang AFP nagdeklarang insurgency free na ang 110 ka mga barangay nga karon gisulod sa Retooled Community Support Program (RCSP) nga gipatuman ni Gov. Tyron Uy sa Province of Davao De Oro ilalom sa gimugna niyang Oplan Pagbabago-ELCAC. (Gilbert M Cabahug PAO-ID DDO, Photo by Jonnie Cadiz)
