Naruay A Bin-I A Bukbukel Ti Natnateng, Naipaay Kadagiti Mannalon Nga Agmulmula Ti Natnateng Ditoy Probnsia

Nasursurok ngem tallo a milyon a pisos balor dagiti bin-I a bukbukel ti natnateng ti naibunong iti Provincial Agriculture Office.

Naggapo dagiti nasao a bukbukel iti Department of Agriculture Regional Office Field Office I babaen iti panangkiddaw ti Gobierno Probinsial.

Maibilang ditoy ti 199 a kilo regular a bukbukel nga agbalor ti nakurkurang ngem dua a milyon a pisos a para kadagiti mannalon a nakana a naapektaran ti Covid-19 ken sangapulo ket pito ribu lima gasut a pakete nga agbalor ti nasursuruk ngem maysa a milyon a pisos.

Manaig iti daytoy, napalaus ti panagyaman ni Gob. Matthew Marcos Manotoc ken ni Agriculture Sec. William Dar ken ti sibubukel a departamento.

Inbunannagna a dagiti nadakamat a bukbukel ti mangipamatmat iti naiget a kalikagumti probinsia a pannakaipatungpal ti panagbalbaliw iti benneg iti agrikultura.

Imbatadna a nabayagen a tarigagat ti probinsia a masukatan iti High Value Commercial Crops wenno HVCC ti panagmula dagiti mannalon ti pagay gapu iti kinalaka ti presyo ti irik a ginubuay ti Rice Tarrification Law.

Ginutugut na dagiti coordinators iti nadumaduma nga ili a mangitandudu iti panagmula dagiti mannalon a magsuporta iti panagmula ti HVCC.

Impanamnamana ti naan-anay a suporta ti gobierno probinsial kadagit mannalon a mangsuporta iti panagmula ti HVCC.

Naiyawat dagiti nasao a bukbukel kadagiti presidente dagiti Vegetable Growers Association iti nadumaduma nga ili ken siudad ditoy probinsia. (Irene Ringor, RPN DZRL Batac Correspondent)         

(Source: Provincial Government of Ilocos Norte)