Nakatakdang mopalit og 800 units sa mobile device nga tablet computer ang General Santos City government ug Department of Education-GenSan, alang sa mga qualified learners, taliwala sa ginapatumang online learning system sa nasud.
Sa pakighinabi sa RPN DXDX Radyo Ronda, gikumpirma ni DepEd-Schools Division Superintendent Romelito Flores nga aprubado na sa City’s Local School Board ang supplemental budget nga P7.1 million nga maoy pondo sa pagpalit sa maong himan.
Dugang pa ni Flores, nakitan sa city government ug DepEd nga labaw’ng kinahanglan ang pagpalit sa maong mga gadgets aron matabangan ang mga estudyante sa ilahang pagtuon.
Alayon niini, nakatakda matod pang konsultahon sa DepEd ang nagkadaiyang eskwelahan aron matudlo ang mga estudyanteng maka-ambit sa maong suporta gikan sa gobyerno ug DepEd.
“Nakita pud nato nga need, naaprubahan pud sa School Board, sa atong halangdong Mayor Ronnel (Rivera), ang pagpalit og tablet. Kana siya, more or less, maka-procure kita mga 800 kabuok,” ang tipik sa pamahayag ni Flores.
Base sa datus, anaa sa kapin 177,000 ang total enrollees sa siyudad, kung asa, 8,000 kapin sa mga niini ang anaa sa “online” learning. (Leo Marten Cellan)