Un persona mas buscada el ya aresta mga autoridad na un operacion de aplicacion de ley na provincial del Lanao del Sur, asegun con el policia del Miercoles.
El Police Regional Office-Bangsamoro Autonomous Region (PRO-BAR), nohay nombra con el arestao persona mas buscada puera lang de habla’r el suspechao es un 33 años soldador.
Asegun con el PRO-BAR, con el persona mas buscada ya aresta na un operacion de aplicacion de ley por medio de servi’r orden de aresto na Barangay Batal Punod, Marantao, Lanao del Sur del Martes.
Asegun con el policia, el arestao soldador tiene pediente orden de aresto por violacion del Comprehensive Dangerous Drugs Act of 2002 con P200,000 recomendao piansa que ya dale el un corte na ciudad de Marawi, Lanao del Sur.
El policia ya habla, el arestao soldador listao como el numero seis persona mas buscada na municipio del Marantao, Lanao del Sur.
Con el arestao persona mas buscada ya pone bajo’l custodia del policia na municipio del Marantao.
Mientras tanto, si Police Brigadier General Prexy Tanggawohn, el director del PRO-BAR, ya alaba con el mga operativas del policia por de ila efectivo arestada del numero seis persona mas buscada.
Asegun con Tanggawohn, el acomplisimiento ta demonstra el inquebrantable dedicacion y determinacion para combate contra droga ilegal y persigui con el mga individual que ta busca mga autoridad na region autonomo. (B. Garcia)
