Cebu City – Upat na ang kompirmadong patay samtang laing unom ang wala pa igkita sa landslide sa minahan sa Carmen Copper Corporation sa dakbayan sa Toledo, Cebu sa miaging hapon.
Kini subay sa gipahigayong search and rescue operations sa mga sakop sa CDRRMO o City Disaster Risk Reduction Management Office sukad alas 6 gahapon sa buntag sa pagtuo nga makit-an ug maluwas ang mga na-missing.
Pagka alas 10:30 sa buntag, naklaro na pila ka minero ang didto sa ilawom dihang mitumaw ang pagdahili.
Ang  Mines and Geosciences Bureau o MGB-7 nagpada usab og team sa lugar aron pagsiksik sa minahan ug paghashas sa sitwasyon.
Si Director Armando Malicse sa MGB 7 ug Director Paquito Melicor, Jr. sa DENR 7 gitakdang mobisita sa dapit.
Base sa iyang mensahe, giagni ni Mayor Perales ang mga kawani pagtabang sa mga kabanay sa namatayng mga minero agigbawos sa nahatag nga buhis sa minahan sa Toledo.
Miluwat og kamandoan ang Mines and Geosciences Bureau o MGB-7pagsuspenso sa operation sa minahan sa CCC gumikan sa hitabo.
Nahinabi sa media, si MGB-7 Director Arman Malicse miingon nga ang ilang gisuspenso mao lang ang open pit sa minahan.
Nakita sa MGB nga ang ground o yuta sa lugar dali rang mohumok kon pirmeng mabasa sa uwan.
Ang pagkahugno sa yuta sa ibabaw nakamugna og15-metros nga tsunami-like phenomenon nga nakaigo sa napu ka minero bisag didto na kini sa giingong safe area.
Nagtuo si Malicse nga nada ilawom sa tubig ang mga biktima hinungdang ilang girekomendar sa kagamhanang local ang pagkuha og divers o busero aron pagpangita sa ubang lawas ilawom sa tubig.
Gipasuspenso sa MGB-7 ang operation hangtod maseguro nga dili na kuyaw ang dapitalang sa mga minero ug ubang trabahante samtang imbestigahon nga nong nahitabo ang pagdahili ug kon ang kompaniya aduna bay tulubagon sa insidente.
(Jhon Tadlip/JTY, photo courtesy of Toledo City Public Information Office)
(Source: Carmen Copper Corporation | MGB 7)
