Tagpahibayo ni Dr. Emmanuel Plandano, an Surigao City Health Officer na may coordination meeting na taghimo sa Philippine Ports Authority dinhi sa ciudad kabahin gihapon sa isyu sa Novel Corona Virus.
Kaiban sa naasoy na meeting an Quarantine Officer sa Caraga Region nga nohimo nan pag lecture sa mga protocols o mga sumdanan sa mga angayan himuon kabahin sa pagbantay na dili makasuyod sa ato lugar an mga tawo nga natapnan na sa bisan kun uno na virus labina sa Novel Corona Virus na tagpanhingusgan nan kagamhanan.
Tagtutukan an mga barko na estranghero na sagad muabot dinhi tungod sa mina. Mitambong isab sa naasoy na tigum sa PPA an mga representante sa mga kumpanya nan mina, MARINA, Coast Guard, Bureau of Customs sanan mga personahe sa Maayong Panlawas sa Ciudad Surigao.
Samtang dugang na tagpahibayo ni Dr. Plandano, tagpahimutang na sa mga Entry Points dinhi sa Ciudad, pareho nan sa mga piers, sa airport sanan sa Land Transport Terminal an mga personahe sa Maayong Panglawas nga may tahas sa pagbantay sa mga tawo na muabot na posible na may daya o kontaminado na sa Corona Virus.
Nosulti isab si Dr. Plandano na hangtud kuman waya pa gajoy nahitala na jaoy tawo na may sintomas sa Corona Virus an nakasuyod sa ciudad. Tag-awhagan niini an katawhan na dili dajon magtoo-too sa mga tabi-tabi kabahin sa corona virus na usahay manggawas bisan na sa social media. (Jhino Parrucho, Ronda 10 RPN DXKS)
