Cebu City- Giaghat sa kagamhanang probinsiyal ang mga kawani nga batasanon ang paggamit og steam inhalation o tuob isip panagang sa pagtapot sa coronavirus disease o Covid 19.
Miluwat og memorandum ang Kapitolyo nga nagmando sa mga empleyado pagpraktis og tuob sa ilang trabahoan.
Ang memo, nga giadres sa mga kawani ug department heads, nagdasig sa tanan paghimog tuob makaduha sa usa ka adlaw – gikan sa alas 8 ngadto sa alas 9 sa buntag ug gikan sa alas 4 ngadto sa alas 5 sa hapon.
Segun sa memo, ang Provincial Health Office ang mosangkap sa mga kagamitan sa tuob ug sa giya unsaon kini pagpahigayon.
Sa sayo pa, giawhag ni Gob. Gwendolyn Garcia ang mga empleyado nga mowat sa tuob dihang duha nila ka kauban sa lainlaing opisina ang nagpositibo sa Covid 19.
Giduso ni Garcia ang maong practice aron pagpalig-on sa immune system isip panagang batok sa COVID-19 pinaagi sa pagluwat og Executive Order o EO No. 17 nga naglatid sa mga protocol ubos sa GCQ o General Community Quarantine.
Atol sa iyang presser sa milabayng adlaw, si Garcia miimbitar kang Dr. Dale Pasco, usa ka hydrotherapy enthusiast, aron pagpasabot bahin sa steam inhalation isip paagi pagpahuwas sa mga sintoma sa COVID-19 ilabi na sa hilanat.