Cebu City- Gipada ni Pres. Rodrigo Duterte si Environment Secretary Roy Cimatu sa dakbayan sa Sugbo aron pagtan-aw ug pag-evaluate sa mga gipanghimo sa siyudad batok sa coronavirus disease o Covid 19.
Mao kini gipadayag ni Pres. Duterte sa iyang miting sa gabinete sa miaging gabii.
Gipasabot ni Duterte nga buot niyang masuta unsa na kagrabe ang sitwasyon sa Cebu City pinaagi kang Cimatu.
Gipahibawo usab sa presidente nga moisyo siyag executive order aron pagpormalisar sa papel ni Cimatu ug midugang nga ang kalihim magda sa gahom sa national task force on Covid 19 sa iyang pag-anhi sa Sugbo.
Nagkanayon si Pres. Duterte nga ang katawhan ug mga opisyal sa Sugbo dayag nga mientra sa gitawag og ‘blame-game’ sa paningkamot nga masumpo ang pagkatap sa Covid 19.
Sumala pa sa pangulo, iyang nasayran nga nagbinasolay ang mga opisyal sa siyudad ug wala na hinuoy makahatag og epektibo nga ideya pagsanta sa virus.
Usa si Cimatu nga mitambong sa miting ni Duterte ug mapainubsanong misanong sa gihatag nga tahas kaniya sa presidente.
Gani, nagpasalamat si Cimatu sa pagsalig sa presidente kaniya ug mipasalig nga iyang buhaton ang tanan kutob sa iyang mahimo aron matuman ang buot mahitabo sa presidente.