Cebu City- Dili una patrabahoon sa Kapitolyo ang mga jail guards ug ubang sakop sa CPDRC o Cebu Provincial Detention & Rehabilitation Center nga nagpuyo sa mga barangay sa Cebu City nga adunay kaso sa coronavirus disease o Covid 19.
Giluwatan sa Kapitolyo ang mando aron dili makaabot ang virus sa CPDRC nga gibutangan sa kapin sa 1,700 ka pinireso.
Sumala pa ni Gob. Gwendolyn Garcia, iyang gitahasan ang warden nga si  Reynaldo Valmoria paghimog imbentaryo sa tanang personnel nga manambong sa trabaho aron pag-ila kon dili ba kini mulupyo sa mga lugar nga adunay kaso sa Covid 19.
Kadtong himatud-ang nagpuyo sa mga barangay sa siyudad nga nabaniog sa coronavirus, dili lang una patrabahoon.
Tungod kay gisuspenso na man ang visiting privilege niadto pang Marso, matod ni Garcia, ang posibleng manakod mao ra usab kadtong mga sakop mismo sa CPDRC.
Hinuon, giklaro ni Garcia nga ang mga guwardiya sa bilanggoan nga dili makatrabaho, makadawat gihapon og suweldo sama sa ubang empleyado sa Kapitolyo nga nagtrabaho sa balay.
Gihimo sa Kapitolyo ang maong lakang human hitapti sa virus ang ubang pinireso ug personnel sa Cebu City Jail nga dili layo sa nahimutangan sa CPDRC sa brgy. Kalunasan.
Apr. 22/Local
