Hangtud pa sunod tuig 2021 nga walay pagabayaran ang mga taga-Sarangani Province sa pagkuha sa ilang laboratoryo ug medical certificate sa tanang pampublikong tambalanan sa probinsya, ma-provincial hospital man ug mga municipal hospital.
Gibutyag ni Eliza Cania, ang provincial treasurer, nga tungod sa paglugway ni Pangulong Rodrigo Duterte sa state of calamity sa tibuok Pilipinas hangtud Setyembre tuig 2021 gumikan sa Coronavirus pandemic, sunod tuig na usab sila sa Provincial Treasurer’s Office mangolekta sa maong public hospital fees.
Nakalatid matud pa sa mga resolusyon nga na-aprobahan niaging mga bulan sa Sangguniang Panlalawigan sa kamanduan ni Governor Steve Chiongbian Solon, nga hangtud dili pa mawala ang national state of calamity, suspendido sa gihapon nga ipatuman ang porsyon sa Provincial Tax Ordinance.
Gituyo kini nga lakang nila Governor Solon, Vice Governor Elmer De Perlata ug tanang board member aron dasigon ang mga lumulupyo nga dili mag-alanganin sa pagduol sa ilang public hospital kung adunay gibati sa kalawasan, hilabi na kung makasinati og sintomas sa flu aron paspas matabangan. Sayod naman ang tanan nga musamot ka-lala ang sitwasyon sa hisgutanang COVID-19 kung may sakit ng daan ang pasyente, sama sa asthma, kidney failure, heart problem ug diabetes.