Gipaniguro karon ni Polomolok Municipal Police Station chief, P/Lt. Col. Alex Joe Orcajada nga mapatubag sa balaud ang mga suspek sa pag-ambush patay sa duha nila ka mga maka-uban, kagahapon sa hapon.
Sa usa ka pamahayag, gihatagan ug duot sa opisyal nga himuon nila ang tanan aron mahatagan ug hustisya ang pagkamatay sa mga kaubanan nga silang Patrolman Bryan Costello ug P/Cpl. Witzel Russ Betantos nga gibanhigan sa pito ka armadong lalaki, sa bahin sa sa Purok 3-B, Brgy. Koronadal Proper, takna alas-2:15 sa hapon.
Nasayran nga nagpahigayon ug pag-patrolya ang maong mga police officers sa dihang nahitabo ang ambush.
Base sa inisyal na imbestigasyon, gidutlo karon ang Nilong Group nga matod pa maoy nagpaluyo sa insidente ug adunay kalabutan sa hugot nga kampaniya sa Polomolok-MPS sa illegal drugs ang motibo sa krimen.
“Kabalo ko nga naga-sadya karon ang mga kriminal pero ipakita namo sa ilaha nga naa kitay gobyerno. Dili moundang ang gobyerno hangtud nga dili sila masumpo,” ang deklarasyon ni Orcajada.
