Wala damha ni Malapatan Mayor Salway “Jun” Sumbo Jr. nga ang simpleng hilanat nga iyang unang gibati ang sinugdanan na diay nga mag-meligro ang iyang kinabuhi. Sa iyang baynte tres (23) ka adlaw nga pagtinir sa St. Elizabeth Hospital sa Gensan, dinhi niini napamatud-an nga tinuod ang Coronavirus.
Gibutyag ni Mayor Sumbo nga dili lalim ang iyang nadangatan sa COVID-19. Nilala matud pa ang iyang kahimtang nga maglisod na sa pagginhawa hangtud nag-desisyon nga mag-intubation kini, butangan og tubo ang iyang baba padulong sa baga aron matabangan sa pagginhawa. Nakita sa resulta sa X-ray nga ni-puti na ang bahin sa iyang mga baga sa kadaghan sa plema. Iyang tuo ug wala nga baga ang maoy gi-atake sa Coronavirus infection.
Sa tulo (3) ka adlaw nga wala kini panimuot samtang anaa sa iyang baba ang tubo, tinuod matud pa ang sugilanon sa mga katigulangan nga kung kritikal ang kinabuhi, makit-an na ang mga mahal sa kinabuhi nga dugay na nga nitaliwan. Daw nigawas ang iyang kalag sa iyang lawas tungod aduna na syay makita.
Wala kini laing gi-ampo sa Ginoo kundili tagaan pa sya og higayon nga mabuhi gumikan nagsugod pa lang kini sa iyang mga kalihukan anaa sa unang termino isip mayor sa Malapatan sa edad nya karon nga kwarentay dos (42) anyos.
Segun ni Mayor Sumbo, isip public servant ug gipili nga opisyal, obligasyon matud pa niini nga ipabalo sa katawhan ang tinuod nga impormasyon kabahin sa Coronavirus hilabi na nga sya mismo ang personal nakatagamtam sa kaisog sa virus.
Si Governor Steve Chiongbian Solon namahayag nga himuon niining spokesperson si Mayor Sumbo sa padayong awareness campaign sa Kapitolyo aron mapahimangnuan ang mga residente nga seryoso ang COVID-19. Nakabalik na sa iyang trabaho si Mayor Sumbo karon lang nga semana. (Provincial Information Office – Sarangani)
