Cebu City – Gideklarar sa Malakanyang ang umaabot Disyembre 4 isip special non-working day sa lalawigan sa Sugbo tungod sa kasaulogan sa ika-104 nga adlawng natawhan ni kanhi Sen. Sergio ‘Serging’ Osmeña, Jr.
Ang maong deklarasyon gisabak sa Proclamation Order no. 1053 ni Pres. Rodrigo Duterte pinetsahan og Nobyembre 18.
Hinuon, wala itataw sa proclamation kon apil ba sa pista opisyal ang tulo ka highly urbanized cities — Mandaue, Lapu-Lapu ug Cebu City.
Ang tulo ka dakbayan dili ubos sa provincial supervision sa gobernador.
Si Serging Osmeña nagsilbing gobernador sa Sugbo gikan sa 1951 ngadto sa 1959; na mayor usab siya sa Cebu City gikan sa 1959 ngadto sa 1963; ug napiling senador gikan sa 1965 ngadto sa 1971.
Suma pa ni Duterte, angayan lang nga hatagan og higayon ang mga Sugboanon nga mosaulog sa adlawng natawhan sa kanhi senador, kanhi gobernador ug kanhi mayor.
Apan kinahanglan lang mosubay sa tukmang health protocols aron paglikay sa coronavirus pandemic.
Sa miaging tuig, gitahasan ni Cebu City Mayor Edgardo Labella sila si Kong. Rodrigo Abellanosa ug anhing Raul del Mar paghimog balaod nga magdeklarar sa matag Disyembre 4 isip special holiday sa siyudad.
(Jhon Tadlip/JTY, photo courtesy of Presidential Museum and Library)
(Source: Official Gazette.gov.ph | Cebu City Public Information Office)
