Cebu City – Gireklamo ni Ma. Victoria ‘Bambi’ Beltran, artist ug negosyante sa dakbayan sa Sugbo, si Mayor Edgardo Labella atubangan sa Ombudsman Visayas tungod sa pagtugot sa tapok-tapok sa mga supporter niini nga dayag nakalapas sa health ug safety protocols.
Giawhag ni Beltran ang Ombudsman pag-imbestigar sa pagtugot sa mayor sa gathering sa mga sakop sa Edlab Riders sa Plaza Independencia niadtong Nobyembre 8.
Alang ni Beltran, nakahimo ang mayor og grave misconduct, conduct unbecoming of a public official, ug kalapasan sa City Ordinance 2566 nga nagdili sa tapok-tapok samtang ubos pa ang dakbayan sa health quarantine.
Gisang-at sa artist ang kaso duha ka buwan gikan sa pagbasura sa korte sa iyang kaso nga gipasaka sa kapolisan tungod sa iyang pag-post bahin sa kahimtang sa coronavirus sa siyudad nga alang ni Labella, fake news.
Base saiyang complaint affidavit, si Beltran miingon nga bisan tuod gihimakak ni Labella nga aduna siyay kasayoran sa tapok-tapok sa mga riders agig saulog sa ilang anibersaryo, sukwahi ang nanggawas nga post sa social media.
Matod niya, niadtong Nobyembre3, ang Edlab Riders nag-post og hulagway sa ilang pagbisita sa buhatan sa mayor samtang gianunsyo usab sa kadagkoan sa grupo nga gipaabot motambong ang mayor sa event.
(Jhon Tadlip/JTY, photo courtesy of Cebu City PIO | Movement Against Tyranny Cebu Facebook page)
(Source: Victoria ” Bambi” Beltran Facebook page)
