Gihatagan ug gahum ug pagtugot sa Sangguniang Panlalawigan si Governor Roberto Uy alang na sa pagprima sa Memorandum of Agreement (MOA) sa ngalan sa kagamhanang probinsyal sa Zamboanga del Norte tali na sa Department of Health Zamboanga Peninsula Center for Health Development alang sa ₱ 500,000 nga financial assistance ngadto sa Liloy District Hospital.
Kini ang gipasupot nga resolution ni 2nd District Board Member Crisologo Decierdo atul sa ilang regular session karong semanaha.
Ang maong ayuda subay kini sa Department Order No. 2020-0643 nga pinetsahan Oktubre 15 niining tuiga o ang Guidelines for the Implementation of the 2020 Medical Assistance to Indigent Patients (MAIP) Program sa tanang DOH Hospitals ug uban pang government health facilities.
Ilawum sa maong kasabutan, ang DOH mobalhin sa mga kinahanglanun pundo ngadto sa probinsya sa mga pasyente nga nanginahanglan.
Ang probinsya walay pinansyal nga obligasyon gawas sa pagseguro nga adunay tambal ug uban pang health care services nga kinahanglan sa indigent nga mga pasyente.
Ingon man, eseguro usab sa probinsya nga ang maong pundo alang lamang kini sa Liloy District Hospital.
Sa maong kalambuan, si Governor Uy nagpasalamat sa kadagkuan sa DOH sa walay puas nga suporta ilabi na sa natad sa maayong panglawas diin usa sa prioridad sa iyang administrasyon.
(Provincial Information Center-mbmontederamos)
