Magsugod na karong bulan sa Agosto, Agosto 24, ang pinakaunang sports academy sa Region 12 alang sa mga interesadong estudyante sa high school, gitawag nga SaNSA kon Sarangani National Sports Academy.
Kini ang gikumpirma ni SaNSA Coordinator Rochel Bantulo-Morido, nga usa pud ka principal sa DepEd Sarangani ug ni Ms. Alma Gabuat, ang provincial sports coordinator human nga may “go signal” na ang DepEd Regional Office sa pamunuan ni Regional Director Allan Farnazo pinaagi sa paghatag og school ID para sa maong pinasahi nga eskwelahan.
Otsyenta (80) kabuok lang ka mga kabataan ang pagadawaton sa SaNSA aron musulod sa duha (2) ka classroom ug matutukan ang tagsa-tagsa ka panginahanglan sa bata. Sa kasamtangan, sobra saysenta (60+) kabuok na ka mga estudyante ang nakapa-enroll. Hangtud pa sa Hulyo 15 ang enrolment sa Department of Education maong pwede pang makahabol.
Gipaklaro nila Principal Maam Morido ug Provincial Sports Coordinator Gabuat nga walay face-to-face nga klase karon sa pagsugod sa school year sa direktiba ni Governor Steve Chiongbian Solon gumikan sa Coronavirus pandemic.
Mupailalum ang mga kabataan sa online ug offline learning experience kon blended education. Ang hisgutanan nga academic subjects sa mga magtutungha nga ga-eskswela sa SaNSA ang ihan-ay sa DepEd Sarangan, ug ang sports training requirements ang tutukan sa Sulong Atleta program ni Governor Solon kung diin manguha kini og mga professional trainer, coaches ug consultants sa ka-parnter ng daan nga PSC o Philippine Sports Commission ubos sa liderato ni PSC Chairman Butch Ramirez.
Ang pagpabarog og sports academy sa probinsya sa Sarangani ang gi-konsepto kini ni Governor Solon aron maalalayan og sakto ang mga atletang Sarangan. Ug tuod man, sa dakong pagsuporta nila Senador Manny ug Congressman Ruel Pacquiao pinaagi sa pagduso og usa ka balaudnon, Pebrero niaging tuig 2019 napirmahan ni Pangulong Rodrigo Duterte ang Republic Act No. 11224 nag-establisar sa Sarangani Sports Training Center. Gani, nahuman na pag-konstrak ang dormitoryo kapuy-an sa mga estudyante ug ang may atop nga Olympic-size swimming pool sulod sa compound sa Kapitolyo.
Samtang, padayon ang pag-awhag ni Sarangani Schools Division Superintendent Gildo Mosqueda nga magpa-enroll na ang wala pa ka-enroll alang sa pag-abri sa klase karong Agosto 24. Extended ang enrolment hangtud Hulyo 15, ug walay gastuhan sa enrolment.
Sa talaan sa DepEd Sarangani niaging adlaw nga Byernes, niabot na sa 106,317 ka mga bata ang nagpa-enroll sa tibuok Sarangani Province ma-publiko ug pribadong elementarya ug sekondarya, lagpas na one hundred thousand kabuok ang naka-enroll.
Kasagaran sa nagpa-enroll gipili ang modular, gisundan sa blended ug ikatulo ang online learning. Aduna puy nipili sa radyo ug telebisyon. Nag-prepara na ang Sulong Karunungan program ni Governor Solon aron maayudahan ang pag-abri sa klase kaabag ang pito (7) ka mayor ug sila Vice Governor Elmer De Peralta ug tanang board member.
Sa pikas nga bahin, gitanggal na ni Mayor Zyrex Pacquiao ang gipatuman nga ECQ kon Enhanced Community Quarantine sa Sitio Barrio Site gumikan nag-negatibo tanan sa swab test ang mga indibidwal nga adunay close contact sa OFW nga taga-Maasim.
Mukabat sa kwarenta (40) katao ang nahimamat ug puros tanan nag-negatibo sa swab test. Nanghinaot ang mga taga-Sitio Barrio Site, Maasim nga striktong ipatuman ang mga palisiya sa quarantine tungod dili lalim matud pa nga ma-lockdown dili makalihok sa adlaw-adlaw nga panginabuhi.