Tulo ka tawo ang samdan human misalpok sa usa ka elf-type truck ang usa ka kotse sa bahin sa Prk. 6, Brgy. Batomelong, ning Lunes sa buntag, April 19.
Subay sa inisyal nga impormasyon sa Traffic Management Unit-GenSan, naka-parada daplin sa dalan ang truck sa dihang gibundol ang lubot nga bahin niini sa maong kotse.
Saysay sa truck driver nga si Joseph Tano, una niyang nabantayan nga pa-ekis-ekis ang dagan sa kotse una kini misuksok sa iyahang truck.
Gikataho usab niini nga nanimaho og ilimnong makahubog ang drayber sa kotse, diin gilayong gidala sa balay-tambalanan, kauban ang dakay niining pasahero.
Nagpadayon pa ang ginahimong imbestigasyon sa TMU kalabot sa aksidente. (John Rey Somido)