Davao City – Pormal nang sugdan ang Konstruksiyon sa bag-ong City Hall sa dakbayan sa Digos sakop sa Probensiya sa Davao del Sur kini human usab nga duna nay nakadaug nga kontraktor sa gipahigayong Bidding dili pa lamang dugay. Ang Bag-o ingon man Modernong City Hall sa Digos nagkantidad ug 170 milyones ka pesos nga gipunduhan ilawom sa Priority Projects for 2018 gikan sa Office of the President.
Sumala pa ni City Engineer Algier Ramos nga karong semanaha sugdan na sa R.G. Salanatin Construction Incorporated ang pagtukod sa City Hall. Tungod niini, gilauman nga pipila ka dalan pasulod sa City Hall ang sarad an sa motorist hinungdan usab nga gipangayo ang pagsabot sa pobliko.
Gidugang pa ni Engr. Ramos nga human matukod ang bag-ong City Hall, sugdan gilayon ang Renovation sa modernong Gymnasium sa syudad nga gipunduhan ug 30 milyones pesos.
Samtang sa pikas bahin, si Digos City Mayor Joseph Penas mipadayag sa iyang kalipay sa pag aproba ni Presidente Rodrigo Duterte nga punduhan ang mga nahisgutang proyekto.
Sumala ni Peñas nga ipailawom sa “turn key project” ang pagkonstrak sa bag-ong city hall ug city gym, nagpasabot nga walay singko sentimo nga ipagawas ang lokal nga gobyerno hangtud di mahuman ang proyekto.
Matud ni Peñas nga dili lang kini usa ka legasiya sa pagtapos sa iyang termino isip amahan sa siyudad kutob Hunyo 30, 2019, sanglit mapahimuslan kini sa katawhan sa Digos ug sa mosunod nga mga opisyal sa dakbayan.
