Cebu City – Gipasalig sa kagamhanang probinsiyal nga walay monopoliya sa bag-ong CNBT o Cebu North Bus Terminal.
Karong adlawa gipahigayon ang soft opening sa maong pasilidad diin gitambongan ni Cebu Governor Gwendolyn Garcia, Cebu City Mayor Edgar Labella, Mandaue City Mayor Jonas Cortes uban sa SM Holdings Inc. Vice President Ms. Marissa Fernan.
Lakip sa mitambong sila si LTO 7 Director Victor Caindec ug LTFRB 7 Director Col. Eduardo Montealto, Jr.
Segun sa report saSugbo News, gihimakak sa Kapitolyo ang taho nga gipakatap sa mga drayber ug operator nga adunay dakong kompaniya sa bus nga nagtinguhang moangkon og ekslusibong katungod sa bag-ong paradahan.
Sa nasayran, gipulihan na sa probinsiya ang pagduma sa operation sa CNBT hinungdang nakigsabot sila sa SM Prime Holdings, Inc. sa pagbutang sa bag-ong terminal sa outdoor parking area sa SM City sa North Reclamation Area, Cebu City.
Gani, si Gob. Gwendolyn Garcia nagpatawag og miting nila ni Bokal Andrei ‘Red’ Duterte sa ikalimang distrito, Provincial Treasurer Roy Salubre, ug sa duha ka operator sa mini-bus niadtong Oktubre 5 aron pagtuki sa maong butang.
Base sa pamahayag ni Garcia, gipasalig sa Kapitolyo sa mga operator sa bus nga ang bag-ong paradahan bukas sa tanan.
Apan ang Kapitolyo gitakdang opisyal nga mobukas sa full operationsa terminal karong Huwebes, Okt. 15. (Jhon Tadlip/ JTY, photo courtesy of Mandaue City – Provincial Information Office)
(Source: Cebu Provincial Government)
