Cagayan de Oro City – Gibutyag karon ni City Epidemiologist Dr. Joey Retuya nga positibo sa Covid-19 ang 28 ka persons deprived of liberty kon PDLs human gipailawom sa swab testing samtang anaa pa sa Bureau of Jail Management and Penology (BJMP) holding area.
Kini na ang ikatulong batch sa mga PDLs nga gidala sa BJMP holding area gikan sa nagkadaiyang detention cells sa istasyon sa kapolisan ning syudad, dugtong ni Dr. Retuya.
Gitataw ni Retuya nga dili pa masuta kung asa ug kinsa ang tinubdan sa virus, apan nagduda kini nga diha ra sulod sa holding area nagtinakdanay ang nahisgutang mga PDLs.
Hinoon, si Dr. Retuya namahayag nga dili angay kabalak-an nga makatakod pa sa uban sanglit wala pa makasulod sa Lumbia City Jail ang nagpositibo sa Covid-19 virus, ug gibutang na karon ang mga piniriso sa 3-storey temporary treatment and monitoring facility sa BJMP nga gibuhat sa syudad.
(City Information Office)