Iriga City – Mas dakol ngunian na paratukdo an minapabor sa pagbuelta kan face to face classes kaysa modular learning na iyo an ginigibo ngunian.
Iyo ini an nagin pahayag ni public school district supervisor Dr. Lowel Besinio kan Baao matapos na maka-olay kan Radyo Ronda, matapos na ibuyagyag an kaisipan kan mga paratukdo sa nagluyang kalidad kan edukasyon huli sa nagtamang pandemyang dara kan covid-19.
Inako kan opisyal na bako sanang dipisil sa parte kan mga estudyantes an modular learning kundi magin sa mga paratukdo, kasabay kan pag-ako na kadaklan sa mga estudyantes nagin hilaw an pakanood sa sistema, alagad mayo soboot sinda nin magiginibo kundi inuton an seguridad kan mga estudyantes.
Alagad ipinahayag kan district supervisor na an ultimong desisyon yaon man giraray sa mga opisyal local, kun boot na ninda na makabuelta an face to face classes depende sa sitwasyon kan covid-19 cases.
Katakod kaini, tinaw’an nin duon kan opisyal na oras na nagbuelta na an face to face classes an inot nindang gigibohon iyo an recovery O make-up sa mga subject na dai nanudan kan mga estudyantes nganing mailamag an saindang pakanood sa grado ninda sa eskuwelahan.
Igua na soboot kaini nin disenyo an Dep-Ed na maresolber sa pagluya kan kalidad nin edukasyon sa panahon kan pandemya, kasabay kan paglaom na makakabalik na sa normal an sitwasyon.