General Santos City – Arestado ang tulo ka tawo human ang gihimong operasyon sa mga personahe sa PDEA, Task Force GenSan ug kapulisan alas 6 pasado ang takna sa gabii sa usa ka lodging house sa Barangay Apopong ning syudad sa GenSan.
Giila ni Kath Abad, tigpamaba sa PDEA 12 ang mga dinakpan nga silang Marvin Gamboa nga maoy target sa operasyon, ingon man silang Ramonito Caparida nga gikonsiderang driver ug runner sa illegal nga droga ug usa ka Jonna Salamanca, kustomer sa droga nga samang mga residente sa GenSan.
Modus matud pa sa mga nasangpit, musulod sa usa ka lodging house kung asa didto ginahimo ang pagbaligya ug illegal nga droga.
Dugang pamahayag ni Abad nga narekober atol sa operasyon ang lima ka sachet sa gituuhang shabu, managlahing drug paraphernalia ug motorsiklo nga maoy ginagamit sa illegal nga transaksyon.
Saysay pa niini nga nga balhin-balhin ug lugar ang mga nasangpit aron nga dili dali madakpan. Apan dugay-dugay na usab nga subling na-monitor ug mibalik sa illegal nga droga si Gamboa human kining makagawas sa South Cotabato Provincial Jail.
Sa karon, ang mga dinakpan ang anaa na sa kustudiya sa PDEA 12 ug gipasakaan na ug kasong pagsupak sa R.A 9165.
(Source: PDEA-XII)