Gipatuman sa Regulatory Compliance Board (RCB) ang Executive Order No. 089-2022 ni Mayor Klarex Uy nga temporaryong nagsuspendi sa permit sa Station 29 nga nahimutang diha sa may Corrales Avenue ning dakbayan tungod sa pagpatukar og kusog nga kanta o’ music.
Ang executive order maoy nakitang solusyon sa hangyo sa mga residente sa maong lugar diin ubay-ubay na ang nadawat nga reklamo sa RCB mahitungod sa kusog nga sound system sa tungang-gabii.
Atol sa pagbisita sa RCB, gipasabot ni RCB Chairman Atty. Jose Edgardo Uy ug RCB Inspectorate Team Leader Antonio Resma, JR. ang management nga magpadayon gihapon ang operasyon sa maong establisemento, apan gibawal ang outdoor sound system sa bisan unsa nga oras.
Giklaro usab sa RCB nga temporaryo lang ang pagsuspendi sa maong permit ug mahimong mabalik ang paggamit sa outdoor sound system kung masuta sa otoridad nga misunod na sa mga gabayan ang establisemento ug dili na makadisturbo ang sound system sa mga residente.
Padayon usab ang pag-obserba sa pwersa sa RCB sa mga kasikbit nga establisemento aron masayran kung lakip ba kini nakalapas sa mga gabayan ug nakadisturbo sa mga residente nga anaa nagpuyo sa maong area.
(Source: Cagayan de Oro City Information Office Facebook page)
