General Santos City – Patay ang usa ka lalaki kansa suspek matud pa sa pagpanulis sa usa ka habal-habal driver human nga misukol sa kapulisan ala 1:30 ang takna kagahapon sa hapon sa Block 2, Asai Village, Barangay Bula, GenSan.
subay sa nakalatid sa blotter book sa Police Station 6, ang suspek giilang si Arthur Magan Cabucos alias Turtor, 39 anyos, ug residente sa Barangay Conel ning dakbayan.
Ayha nahitabo ang insidente, una nang mireklamo sa buhatan sa Bula Police Station ang usa ka habal-habal driver nga si Rony Galo, 27 anyos nga taga Barangay South, Gensan, human matud pa kining gitulis sa suspek. Mukabat sa 5 mil pesos matud pa ang natangag sa suspetsado gikan sa biktima.
Gumikan niini, gilayong nagpahigayon ug hot pursuit operation ang kapulisan diin nasundan ang suspetsado sa area sa Celcary Subdivision, apan nacorner ang nasangpit sa Zone 2, Asai Vill., Barangay Bula human nisulod sa CR sa usa ka boarding house sa lugar.
Gikaingong nipabuto sa iyang pusil ang suspek ngadto sa kapulisan maong gibaslan nga miresulta sa pagkaigo niini. Gilayon kining gidala sa ospital apan gideklara kining dead on arrival sa attending physician.
Narecover sa SOCO team gikan sa nahitabuan ang 2 ka fired cartridge sa 9mm cal., 1 ka fired cartridge sa caliber 45, ug usa ka 1 unit sa caliber 45 nga pusil.
