Sa mensahe ni Municipal Administrator Lilibeth “Ybing” J. Salarda, MPA, giila niya ang dagko ug labing mahinungdanong papel sa mga kababaihan sa katilingban ingon man kaabag sa nation-building. Gidayeg ni Admin Ybing ang MSWDO Alabel sa pagpanguna ni MSWDO chief Rona J Padilla, RSW sa pagpahigayon og susama nga aktibidad alang sa mga kababaihan sa Alabel asa napakita usab nila ang ilang mga talento.
Guest speaker sa National Women’s Month culmination activity mao si Glenda Revaño, public employment services officer sa Sarangani Prov’l Government. Sa iyahang mensahe, gipasidunggan niya ang mga kababaihan sa ilahang kontribusyon sa katilingban ug sa ilahang tagsa-tagsa ka pamilya.
Gitambungan ang maong aktibidad sa 13 ka barangay sa Alabel nga gilungkuban sa mga opisyales, ug trabahante sa matag barangay.
Subay sa Proclamation No. 224 s. 1988 gideklara ang unang semana sa Marso matag tuig isip Women’s Week ug ang Marso 8 isip Women’s Rights and International Peace Day, ang Proclamation No. 227 s. 1988 alang sa observation sa bulan sa Marso isip Women’s Role in History Month; ug Republic Act (RA) No. 6949 s. 1990 asa gideklara ang March 8 matag tuig isip National Women’s Day.
Ang Marso matag tuig gideklara nga National Women’s Month sugod March 1 hangtud 31. Tema sa karong tuiga nga kasaulugan sa Women’s Month 2023 mao ang “WE for Gender Equality and Inclusive Society.” (ALABEL INFORMATION OFFICE)
