Tantangan, South Cotabato – Naghimo na ug makuting imbestigasyon ang Tantangan PNP kalabutan sa nahitabong pagpamusil sa usa ka negosyante nga nahitabo sa Brgy. San Felipe sa maong lungsod alas 3:00 ang takna sa hapon kagahapong adlawa, Enero 11, 2022.
Giila ang biktima nga si Ronnie Bignayan, 55 anyos, nanag-iya ug tindahan ug paso ug residente sa maong barangay.
Matud ni Police Lt. Renjun Bagaman, Hepe sa Tantangan PNP nga subay sa pahayag sa biktima atol sa ilang gihimong interview, samtang nagkargamatud pa siya ug paso sa sakyanan sa ilang customer, kalit lang matud pa siyang giduol sa wala mailhing suspek dayon gipusil igo sa iyang nawong nga bahin.
Paspas usab matud pa nga misibat ang suspek human sa insidente, samtang siya dali nga gidala sa ospital, swerte usab nga dili grabe ang samad nga iyang naangkon ug kasamtangang nagpaalim nalang sa ospital.
Dugang subay ni Police Lt. Bagaman nga sa karon wala pa silay natumbok nga motibo sa pagpamusil ngadto sa biktima gumikan bisan ang biktima mismo wala nakaila sa nahisgutang suspek.
Wala man usab matud pa siyay nakalaban nga posibleng mamahimong hinungdan sa pagpusil ngadto kaniya.
Sa karon hinay hinay nang naghimo ug mas lawom nga imbistigasyon ang Tantangan PNP aron nga masuta kung unsa gyud ang tinuoray nga motibo sa maong pagpamusil.
(Source: Tantangan PNP)