Gipalig-on sa Philippine National Police (PNP) ug sa Local Government Unit (LGU) sa Dapitan City ang ilang panagtambayayong alang sa pagmintinar sa kalinaw, kahapsay, ug seguridad sa komunidad.
Kabahin sa maong paningkamot ang courtesy call ni PLTCOL Eleno A. Dondoyano, Force Commander sa 1st Zamboanga del Norte Provincial Mobile Force Company (1st ZNPMFC), kang Hon. Evelyn T. Uy, City Mayor sa Dapitan City.
Nahimong higayon ang maong pagbisita aron mapalawom ang koordinasyon tali sa kapulisan ug lokal nga pangulohan, ilabina sa pagpalig-on sa mga lakang alang sa peace and order, public safety, ug community security.
Gipasiugda sa duha ka liderato ang kamahinungdanon sa hiniusang paningkamot ug epektibong koordinasyon sa pag-atubang sa mga isyu nga may kalabotan sa kalinaw ug seguridad sa siyudad.
Pinaagi sa lig-on nga partnership tali sa 1st ZNPMFC ug LGU Dapitan City, padayon nga gisuportahan ang mga inisyatiba nga nagtumong sa pagpanalipod sa katawhan ug pagmintinar sa malinawon ug luwas nga palibot.
Ang maong panagtambayayong nagpamatuod nga ang pagpanalipod sa komunidad mas mahimong epektibo pinaagi sa pagkahiusa, koordinasyon, ug hiniusang responsibilidad sa kapulisan, lokal nga pangulohan, ug katawhan.(IKEN B. GULLEM)
Source: PNP Zamboanga del Norte 1st Provincial Mobile Force Company