Gisugdan sa Bureau of Fire Protection (BFP)–Katipunan Municipal Fire Station ang pagtudlo sa fire safety sa mga bata sa sayong edad pinaagi sa pagpahigayon og Fire Safety Lecture, Earthquake Drill ug Fire Drill alang sa mga Day Care learners sa Barangay San Vicente.
Ubos sa pagpangulo ni FINSP Richard A. Parame, Acting Municipal Fire Marshal, gipaila sa mga bata ang mga batakang pamaagi sa paglikay sa sunog, hustong paglikas panahon sa emerhensiya, ug mga angay buhaton sa dili pa, samtang, ug human sa usa ka insidente sa sunog.
Pinaagi sa mga diskusyon ug aktuwal nga demonstrasyon, nakat-on ang mga batan-on kon unsaon nila paglihok ug pagpabiling luwas kung adunay sunog o linog.
Gipasiugda sa BFP nga importante ang sayong pag-edukar sa mga bata bahin sa fire safety ug disaster preparedness aron maanad sila sa hustong pagtubag panahon sa emerhensiya.
Ang maong kalihokan kabahin sa padayon nga paningkamot sa BFP sa pagpalig-on sa kahibalo ug kahandam sa komunidad, ilabina sa mga bata nga mahimong importante usab nga makatabang sa pagpaabot sa mensahe sa kaluwasan ngadto sa ilang mga pamilya.
Pinaagi sa pagkat-on sa fire safety samtang bata pa, mas mapalambo ang kultura sa pagbantay, kahandam ug kaluwasan sulod sa komunidad.(IKEN B. GULLEM)
Source: BFP R9 Katipunan Fire Station