Sa nagpadayon nga Local Government Support Fund (LGSF) -FALGU Rice Distribution Project, mikabat sa 865 ka pamilya gikan sa nagkalain-laing barangay sa Sibutad ang nakadawat og 20 kilos nga bugas alang sa ilang pang-adlaw-adlaw nga panginahanglan sa pagkaon.
Ang matag benepisyaryo nakadawat og 20 kilos nga bugas nga gitakdang mokobre sa ilang panginahanglan sulod sa duha ka bulan. Padayon ang implementasyon sa programa hangtod Disyembre 2026, isip kabahin sa suporta alang sa mga pamilyang labing nanginahanglan.
Lakip sa mga nakadawat ang mga kabus nga pamilya, solo parents, senior citizens, ug uban pang kwalipikadong sektor nga apektado sa pagsaka sa presyo sa mga batakang panginahanglanon.
Si Vevencia Tomado, 62, residente sa Barangay Kanim, mipahayag sa iyang pagpasalamat sa tabang nga iyang nadawat, nga matud niya dako og ikatabang sa panginahanglan sa iyang pamilya.
Nagpasalamat usab sila Joseph Andilab, 71, sa Barangay Panganuran, ug Fely Rose Duhaylungsod, 52, sa Barangay Marapong, tungod sa nahatag nga suporta.
Kining LGSF-FALGU Rice Distribution Project ipatuman usab sa mga kwalipikadong benepisyaryo sa nagkalain-laing munisipyo sa Zamboanga del Norte, nga nagtumong sa paghatag og direktang ayuda aron mapagaan ang gasto sa pagkaon sa mga pamilya nga labing nanginahanglan.
Sa Sibutad, ang 20-kilo nga bugas naghatag og konkretong pahupay sa mga benepisyaryo, ilabina sa mga panimalay nga nag-atubang sa padayon nga pagsaka sa presyo sa mga batakang palaliton.(IKEN B. GULLEM)
Source: Zamboanga del Norte Provincial News Network