General Santos City – Patay sa engkwentro ang usa ka lalaki nga suspek human kini giingong nagpabuto og armas dihang gibabagan sa mga pulis sa checkpoint sa Purok Udagre, Barangay Conel ning dakbayan.
Matod ni Police Captain Ulf Tabucon, hepe sa Police Station 4 sa GSCPO, nga nahitabo ang insidente mga ala 1:30 sa kaadlawon niadtong Lunes sa checkpoint sa kapolisan sa nahisgutang lugar.
Ang mga pulis nga gipakatap sa maong dapit giingong nisuway og intercept sa suspek samtang nagmaneho sa motorsiklo tungod sa kadudahan niini.
Apan imbes mohunong, iya hinuong gipusil ang mga pulis.
Tungod niini, nibawos usab og pinusilay ang kapolisan nga miresulta sa iyang kamatayon.
Narekober sa crime scene ang wala matinong matang sa pistola ug motorsiklo nga gituohang maoy gigamit sa suspek.
Gisusi pa sa kapolisan ang nahitabong pinusilay ug gisuta usab ang identity sa napatay nga suspek.