Sarangani Province – Kapin sa 1,400 ka mga mag-uuma gikan sa tibuok Rehiyon XII nakadawat ug agricultural interventions gikan sa Department of Agriculture (DA) atol sa paglusad sa Agri-Puhunan at Pantawid (APP) Program sa DA sa Mindanao kaahapong adlawa, Abril 11, 2025 nga gilusad sa Sarangani Provincial Gymnasium, Alabel, Sarangani Province.
Ang naasoy nga programa usa ka komprehensibo nga inisyatiba sa DA ug Development Bank of the Philippines (DBP) nga gidesinyo aron mapalambo ang produktibidad ug madugangan ang kita pinaagi sa paghatag og pinansyal ug teknikal nga tabang sa mga kwalipikadong mag-uuma nga adunay access sa input credits, monthly allowances, ug intervention monitoring cards (IMCs).
Si Presidente Ferdinand R. Marcos Jr., uban sa mga opisyal gikan sa DA ug Mindanao Development Authority, nangulo sa paglusad sa maong Program ug sa paghatag ug nagkalain-laing interbensyon sama sa mga makinarya sa uma ug mga ekipo ngadto sa mga lokal nga kagamhanan sa probinsiya sa Sarangani, Cotabato, South Cotabato, ug Sultan Kudarat, ingon man sa pipila ka mga local government units ug mga kooperatiba ug asosasyon sa mga mag-uuma.
Mokabat sa 1,496 ka mga mag-uuma nga benepisyaryo ang makadawat sa ilang mga Agri-Puhonan nga magamit sa pagpalit sa mga liso ug abono, ingon man uban pang mga himan alang sa pagpanguma, pinaagi sa mga akreditado nga negosyante.
Ang pinili nga mga kooperatiba sa mga mag-uuma hatagan usab og mga galingan sa mais, shellers, threshers, tractors, hauling trucks, mobile disinfection trucks, ug incubators, nga makatabang sa pagpauswag sa agrikultura sa rehiyon.
Pinaagi sa APP Program, ang gobyerno mohatag sa mga mag-uuma og P32,000 nga tabang pinansyal, nga iapud-apod isip P8,000 matag unang semana sa matag bulan sa mosunod nga upat ka bulan.
Gitugotan usab niini ang mga kwalipikado nga mag-uuma nga makapahulam sa porma sa input credits hangtod sa P28,000 aron makapalit mga input sa umahan sa bisan unsang accredited nga mga negosyante ug makapahimulos sa serbisyo sa umahan sa mga accredited nga service provider.
Ang paglusad sa tibuok rehiyon sa programa ug ang paghatag ug mga interbensyon, ingon man ang Kadiwa ng Pangulo, gipahigayon sa Sarangani Provincial Capitol Gymnasium.
Si Sarangani Governor Rogelio D. Pacquiao nagpahayag sa iyang pasalamat sa nasudnong kagamhanan sa pagsugod niini nga programa alang sa “labing kugihan ug dili hakog nga mga tawo sa atong nasud; ang atong mga mag-uuma.” (Rem Agdon)
News&Photos: PIO-Sarangani