Kapin 423 ka wanted persons ang nasikop sa Central Visayas atol sa Agosto 2026, gumikan sa padayong manhunt operations sa Police Regional Office 7 (PRO7).
Ang mga pagdakop nahimo pinaagi sa 423 ka operasyon sa mga tracker team ug police units sa tibuok rehiyon. Tumong niini nga dali nga mapatuman ang mga warrant of arrest batok sa mga personalidad nga gipangita sa balaod.
Sa 423 nga nasikop, 88 ang Most Wanted Persons (MWP) samtang 335 ang Other Wanted Persons (OWP). Lakip sa mga Most Wanted ang 14 nga regional level, 39 provincial level, 6 city level ug 29 municipal level.
Matod ni PRO7 Regional Director PBGen Arnold E. Abad, ang matag pagdakop makatabang sa pagpalig-on sa kaluwasan sa mga komunidad. Giingon niya nga magpadayon ang mga tracker team sa pagpangita sa mga wanted persons ug pag-atubang niini sa hustong korte, subay sa balaod.
Gidasig usab sa PRO7 ang publiko nga motabang pinaagi sa paghatag og impormasyon bahin sa mga wanted persons ngadto sa labing duol nga police station o pinaagi sa Unified 911 Emergency Hotline. Padayon ang police operations ug pakigtambayayong sa komunidad aron mapadayon ang kalinaw ug seguridad sa Central Visayas.
I via Renante Socia Lada