Padayon pa gihapong gipang apod-apod ang mga food packs nga giandam sa kagamhanang probinsyal sa Zamboanga del Norte aron ipanghatag sa apektado nga katawhan sa gi-imposar nga general community quarantine ni Governor Roberto Uy gumikan sa giatubang karon nga krisis sa makamatay nga Corona Virus Disease o CoVid-19 ug sa pagluway niini sa community quarantine hangtud Abril 30 niining tuiga.
Kini ang gipamahayag ni Mr. Quintin Morgia, Jr. ang Bodega Incharge sa Provincial Social Welfare and Development Office (PSWDO).
Sulod sa matag food pack mao ang bugas, sardinas, monggos, itlog, noodles, cooking oil, gatas, kape, bottled water ug brown sugar.
Alang sa panginahanglon sa kalimpyo sa lawas, anaa ang sanitary napkin, baby diaper, toothpaste ug bath soap.
Gipasabot ni Mr. Morgia nga base sa gisunod nga balaud panahon adunay kalamidad, una mopagawas sa hinabang o ayuda mao ang barangay, sundan sa syudad o munisipyo ayha na ang augmentation sa probinsya sa Zamboanga del NOrte.
Subay niini, gipasalig sa maong opisyal nga moabot ra unya sa matag lungsod o syudad dinhi sa probinsya ang maong food packs alang sa naapektuhan sa krisis ngi giatubang karon.
Giawhag usab niya ang katawhan dinhi nga adunay insaktong estado pinansyal nga mo-donar alang sa grabeng naapektuhan sa pag-imposar sa general community quarantine ilabi na ang nagsalig lamang sa adlaw-adlaw nilang kita.
Adunay 16 ka food items ang sulod sa matag food pack nga gipang-apud-apud sa naapektahan sa gi-imposar nga general community quarantine aron dili mokuyanap ang CoVid-19 dinhi sa atong dapit.
Gipaklaro nga unahon sa paghatag ang pamilya nga labaw’ng nanginahanglan diin walay bulok sa politika, botante man ug dili botante.
Sa pagkakaron, pabiling 0-case sa CoVid-19 ang Zamboanga del Norte base sa datus sa Task Force CoVid-19 sa probinsya.
Niini, giawhag lamang ang publiko nga magpundo lamang sa balay kung dili importante kaayo ang tuyo sa gawas, mosagup sa social/physical distancing, kanunay maghugas sa kamot gamit ang sabon ug tubig, mogamit usab ug alcohol.
Kung mo-ubo ug manghatse, tabunan ang baba sa tissue ug ilabay gilayon kini sa basurahan.
Mosunod usab unsay gimando sa gobyerno aron malikayan ning maong makamatay nga sakit.
