Cebu City – Mikabat ug dul-an sa 60 ka tawo lakip sa tulo ka piniling opisyal ug usa ka kawani sa nasodnong gobyerno ang nadakpan sa tigbakay sa lungsod sa Poro, Camotes, Cebu kagahapon.
Segun sa pasiunang reports sa PIU o Provincial Intelligence Unit, nasakpan ang 55 nga nanambong sa illegal derby sa Gallera de Lagnasan sa brgy. Esperanza.
Gilusad ang operation sa mga sakop sa PIU ug 1st Provincial Mobile Force Company (PMFC) nianang alas 12:05 lapas sa tungang gabii o gahapon sa kaadlawon.
Nailhan ang piniling mga opisyal nga apil sa nadakpan nga sila si Konsehal Ashley Otadoy, 54 ug Andrew Zurita, 38; ug kagawad Dennis Camomot, 48, sa brgy. Mercedes.
Nasikop usab si Cliff Otadoy, 52, nga usa ka empleyado sa Department of Interior and Local Government o DILG-7.
Nahinabi sa mga tigbalita, si Col. Engelbert Soriano, director sa CPPO, miingon nga ang mga dinakpan gitanggong sa selda sa kapolisan sa Poro.
Suma pa ni Soriano, base sa updates nga iyang nadawat gikan sa mga operatiba, nakadawat og tip ang PIU ug PMFC sa illegal derby hinungdang gilusad nila ang operation. (Jhon Tadlip/JTY)
(Source: Cebu Provincial Police Office, photo courtesy of Poro Municipality Police Office)