Cebu City – Gikeha sa pamilyang Garcia ang duha ka mananambal sa sa pribadong ospital nga miatiman sa namatay nilang igsoong mayor sa Barili, Marlon Garcia.
Mao kini gibutyag nila ni Gob. Gwendolyn Garcia, Kong. Pablo John Garcia sa ikatulong distrito, Atty. Winston Garcia, ug ni kanhi Gob. Pablo Garcia atol sa press conference kagahapon.
Matod nila, ilang gisang-at ang kasong medical negligence batok sa duha ka doctor sa Chong Hua Hospital atubangan sa Cebu City Prosecutor Office sa miaging adlaw.
Hinuon, wala lang una ibutyag sa media ang ngan sa mga sinumbong samtang wa pa kini makuhai og reaksyon.
Base sa findings sa usa ka doctor ug propesor sa Medicine and Infectious Disease sa Department of Medicine sa Loyola University Stritch School of Medicine sa Chicago nga si Dr. Ravi Durvasula, ang mga Garcia miingon nga ang kakuwang sa pagbantay, pag-atiman, kuwestiyonable ug wa kinahanglana nga laboratory test ug treatment uban sa exaggerated o unsupported nga laboratory results sa duha ka mananambal ang hinungdan sa kamatayon ni Marlon.
Sa nasayran, namatay si Marlon niadtong Setyembre 6 tungod sa septic shock secondary to catheter-related bloodstream infection ug ventilator-associated pneumonia samtang ang lain nilang igsoong si Nelson mitaliwan tungod sa cardiopulmonary arrest secondary to probable massive pulmonary embolism.
Pulos sila positibo sa coronavirus disease apan ang pamilya miinsister nga dili ang impeksyon ang nag-unang hinungdan sa ilang kamatayon. (Jhon Tadlip/JTY)
(Source & photo courtesy of Gov. Gwen Garcia Facebook page)
