Cebu City- Nagpasiugda ang Department of Health o DOH-7 og fact-finding initiative aron pagtin-aw sa hinungdan sa kamatayon sa usa ka Briton sa Sugbo nga giingong gibalibaran ug wala dawata sa pipila ka ospital.
Atol sa virtual press conference, si Dr. Jaime Bernadas, director sa DOH-7, namahayag nga nanghipos na sila og impormasyon bahin sa kamatayon sa Briton.
Sa nasayran, ang maong isyu miabot na sa atensiyon sa nasodnong kagamhanan.
Matod pa ni Bernadas, mohimo lang una silag fact-finding sanglit wala pa man silay nga nadawat nga reklamo.
Midugang si Bernadas nga ilang ipatawag ang mga mitubag sa alarma o responders, drayber sa ambulansiya, ug mga sakop sa pasilidad nga gilambigit sa insidente.
Una niini, si foreign affairs Secretary Teodoro Locsin Jr. nangayog pasaylo sa United Kingdom sa kamatayon sa Briton nga giingong wala dawata sa mga ospital sa Cebu.
Ang  Briton, nga wala mabutyag ang ngalan namatay niadtong Hunyo 17.
Sa maong higayon, ang mga tambalanan sa Sugbo giingong napuno na sa mga pasyente sa Covid 19 nga nagpakitag grabeng mga sintoma.