Cebu City- Gipugngan sa Phivolcs o Philippine Institute of Volcanology & Seismology ang mga mulupyo pagsud sa upat ka kilometro nga radius sa danger zone sa bolkang Kanlaon sa Negros island nunot sa kutay sa mga pagtay-og sa milabayng 24 oras.
Gitug-an sa Phivolcs nga nakatala silag 136 ka volcanic tremor alas 8 gahapon sa buntag.
Segun sa bulletin sa Phivolcs, gibutang sa alert level 1 ang bolkang Kanlaon nga nagpasabot nga nagpakita kinig abnormal nga kahimtang o mga timailhan sa pagbuto.
Matod sa Phivolcs, gipasidan-an ang mga LGUs o local government units ug ang publiko nga gidili ang pagsud sa 4 kilometro nga PDZ o Permanent Danger Zone aron paglikay sa disgrasya.
Nasayran nga sa 136 ka pagtay-og, miabot ang labing kusog og 4.7 magnitude nga natala alas 2 pasado gahapon sa kaadlawon.
Nabatyagan kini sa gikusgong  intensity 4 sa siyudad sa La Carlota, Negros Occidental.
Ang volcano-tectonic quakes nasinati usab sa Bago City ug Bacolod City sa gikusgong Intensity 3;Â Intensity 2 sa Canlaon City, Negros Oriental; ug Intensity I sa Iloilo City
Nakamatikod usab ang Phivolcs og kausaban sa ubos ug tunga-tungang bahin sa slope sa bolkan sukad niadtong Enero.