Aron sa pagprotiher sa mga katawhan alang sa limpiyo, luwas ug balanse nga kina-iyahan, gimugna ang Climate Change Act niadtong 2009 aron makahimo og mga programa ang gobyerno ug maka-adaptar sa mga strategic goals alang na sa pagdepensa sa worldwide phenomenon nga climate change.
Subay niini, ang kagamhanang lokal sa Dipolog pinaagi sa City Environment and Natural Resources Office (CENRO) sa pagdumala ni City Environment and Natural Resources Officer, Mercidita Guerrero ang mipahigayon sa tulo (3) ka adlaw nga workshop sa “Local Climate Change Adaptation Plan” (LCCAP) sugod Pebrero 7 hangtod 9 ning tuiga, didto sa Atrium, Top Plaza Hotel, ning dakbayan.
Sa pagbukas sa nasangpit nga kalihukan, mihatag og mensahe si Mayor Darel Dexter T. Uy diin sumala niya, kinahanglan nga hatagan og importansiya ang kina-iyahan tungod kay ang climate change, dako kaayo ug nahimong epekto sa kinabuhi sa tawo.
Dugang niini, nga kinahanglang masayod ang mga katawhan sa hinungdan nganong nagsige og usob-usob ang dagan sa panahon ilabina ang mga kabaranggayan ug kining nahisgutan nga workshop maoy usa sa lakang aron malamdagan ang mga lumulupyo sa mga barangay.
Nasayran nga aron mamugna ang mga stratehiya dinha sa pagprotehir sa kina-iyahan, ang kagamhanang nasyonal mihimo ona sa National Climate Change Action Plan (NCCAP) ug ang mga guidelines nga nahimo niini mao na usa’y gihimong sumbanan ngadto na sa mga Local Government Units (LGU).
Ang LCCAP isip mandato, gikinahanglan nga i-imposar sa tanang mga LGUs sa tibuok nasud tungod kay kini inisyatibo sa gobyerno dinha sa pagpangandam ug pagpanagang sa mga talagsa-ong panghitabo nga posibleng mohapak sa usa ka lokalidad.
Ang nahisgutan nga kalihukan ang gitamboangan usab sa mga opisyales sa nagkalain-laing barangay ning dakbayan, mga hepe sa mga buhatan sa kagamhanang lokal sa Dipolog lakip na ang mga personahe sa DTI, DPWH ug PHIVOLCS.
(Source: Dipolog City Government Facebook page)